78. (6. ) Oratio pro Rege.

(Dubius. )

Oremus pariter toto de corde rogantes, Ut tibi praesidio caelestia porrigat arma Arbiter omnipotens, ut possis fortiter hostes Debacchare tuos ferri de cuspide fossos 5 Et valeas regum multorum frangere colla,

Qui Dominum verum nolunt cognoscere Christum, Qui Deus est unus vere cum patre colendus; Quem superus totus cognoscit et infimus ordo, Quem chorus angelicus collaudans semper adorat,

10 Et genitum patris totum diffusa per orbem Ecclesia Christum cognoscit et omnipotentem; Qui mare, tellurem, caelum, qui cuncta creavit, Quae mundus totus per totum continet iste; Qui posuit celso lucentia sidera caelo

15 Et roseis totum coloravit floribus orbem, Sideribus variis superum depinxit Olympum, Muneribus sacris mundum ditavit et imum; Qui concessit aquis geminos producere fructus Et diversa locis diversis ponere sanxit,

20 Scilicet altilium sursum laticumque deorsum, Ut plebs pennivola caeli concrescat in auris Et squammosa sali fluides concrescat in undis, Illa poli volitans siccas transverberet auras, Ista maris bibulas natans transcurrat arenas;

25 Cuius ad imperium rutilans adlampadat ignis Et tremulas mittunt timida tonitrua voces, Nebula discurrens properat dispergere nimbos, Grandinis ut fractos iaculet. de ventre lapillos, Arcus in excelso servato foedere durat,

30 Ne cataclysmus aquae terrarum germina perdat, Tendit et igniferos mundi per compita crines

Sol nimium rutilus, pulcherrimus atque coruscus, Impleat ut totum proprio de lumine mundum. Plura quid enumerem? Christo parere potenti 35 Omnia festinant, quae nunc per saecula durant.