404. In honore s. Michaelis Archangeli.

1. Splendida nempe dies rutilat
Angelicoque canore boat,
Aethereis redimita choris,
Gramineis quoque compta bonis,
Dans nova gaudia terrigenis.

2. Fruge putando solum renovat,
Aurea mala ferendo micat,
Munera Bacchica jam reparat,
Mellica vinitor hausta parat,
Palmes ut hinc sua dona ferat.

3. Sidera, pontus et arva canunt,
Tripudiant simul et recinunt
Nobile carmen et angelicum
Et Michaelis honore sacrum
Nomen ad astra boando ferunt.

4. Laudibus aethereis celebrem
Pangimus hunc reboando diem,
Quo Michael, superum satrapa,
Sede refulsit ab uranica
Dans populis pia subsidia.

5. Belliger inclitus atque potens,
Clarus et auctus ubique manens,
Squamea colla terens colubri
Faucibus obruat in barathri
Munere victor ubique Dei.

6. Pertonat hinc reboans jubilum,
Plebs superum venerando Deum
Fumida namque cohors zabuli
Territa pulsibus angelicis
Necibus est data tartareis.

7. Euge, potens Michael hagie,
Agmine candidus angelico,
Sidere pulchrior ignicomo
Clarior et rutilante polo,
Aethere celsior astrigero.

8. Coelicolum boue dux procerum
Eximiumque decus hominum,
Restituens animas superis
Luuiger arcibus aethereis
Civibus inter et esse piis.

9. Ultima namque dies veniens
Flammivomoque fragore furens,
Cum tremor horridus ingruerit,
Judicium miseris minitans
Et rea pectora terrificans.

10. Primus ad haec Michael renitet,
Cujus abhinc tuba triste canet,
Arva polumque boans quatiet,
Et tumulis cineres salient
Functaque somata viva fient.

11. Rex Deus arbiter adveniet,
Stigmata carnea tunc referet,
Aethereo comitante choro
Ordine septus et angelico
Splendidus et grege de niveo.

12. Terribilis quoque judicio
Fulmineo praeeunte globo,
Tartara saeva parat reprobis
Hinc et amoena virecta probis,
Dulcia plausibus hymniphonis.

13. Tempore quo pius intuitum
Dirige, poscimus, angelicum,
Belliger o Michael, famulis
Subveniens miserando tuis,
Sidereis reparando bonis.

14. Agmina coelica dulcisonis
Concinimus reboando sonis,
Ter quoque trina per officia
Perpete coelitus exposita,
Pangit ut alma theologia.

15. Pneumate diva cohors rutilans,
Splendida plebs, veneranda phalanx,
Condita sedibus in superis
Omnibus et superaucta bonis,
Laudibus inclita perpetuis.

16. Prima ierarchia compta thronis
Eminet arcibus aethereis,
Post Cherubim Seraphimque choris,
Fatur ut eminus ante data
Hymnologia hypophetica.

17. Virtus abhinc, dominatus adest
Atque potens sacer ordo nitet
Hisque ierarchia fit media,
Qualiter omniparens usia
Segregat, ordinat, imperitat.

18. Ultima denique principibus
Pulcha ierarchia sidereis
Tradita praeclue theosophis
Coetibus emicat archigeris
Angelicis radians cuneis.

19. Eminet his ceu sol rutilans
Archostratos Michael radians,
Vultibus ante Dei residens,
Clare Deum Dominumque tuens,
Nominis ore sui renitens.

20. Ergo per hos veneranda fiunt
Jussa patris sophiaeque patris
Pneumatis et simul almifici,
Quod teletarchia trina manet
Simplexque perpes usia viget.

21. Virtus herilis amica Deo,
Pondere libera corporeo,
Sophia condita principio
Et necis inscia, nexa Deo,
Lumina vivida sidereo.

22. Nuntius alma refert Mariae
Famina coelitus en Gabriel,
Quod Dominum ferat Emanuel,
Hoc paranymphus ovanter ait,
Haec paritura Deum tumuit.

23. Certa salus Raphael miseris,
Dux sociusque valens peregris
Dansque remedia semper aegris
Fert pia tristibus auxilia
Pellit et horrida praestigia.

24. O pie rector ab arce potens
Excipe carmina nostra libens,
Quae tibi turba fidelis ovans
Laudibus intonat almiphonis
Subdita vultibus, ecce, tuis.

25. Quae Michaelis honore diem
Nunc peragat referens celebrem
Agmina regis et aetherei
Pervolitantia regna poli
Plaudit et intonat aula Dei.

26. O Michael, decus omne tuis,
Ductor et ordinis angelici,
Regis et armiger aetherei,
Suscipe, quae tua plebs hodie
Cantica pertonat, o hagie.

27. Has epulas pie sanctifica
Mentis et intima purifica,
Corpora cordaque clarifica,
Daemonis obrua colluvia
Dando tuis pia suffragia.

28. Respice, quae tibi deferimus,
Adspice, quod humiles petimus,
Inspice, quae tibi concinimus,
Respice nos, quia te canimus,
Conspice nos, sicut expetimus.

29. Disjice pondera tu scelerum,
Criminis elue discidium,
Pelle paventibus excidium,
Ferto petentibus auxilium
Dans, pater optime, subsidium.

80. Non rabies hominum laniet,
Pestis, inedia non cruciet,
Nimbus et aura non extenuet,
Perpete protege nos famulos
Ac miserando tuere tuos.

31. Gloria, virtus, honor maneat
Ingenito genitoque Deo,
Spiritui quoque paraclito,
Qui Deus exstat et omnipotens
Trinus et unus idemque manens.