66. In Ascensione Domini.

1. Rex omnipotens
die hodierna

2. Mundo triumphali
redempto potentia

3. Victor ascendit caelos,
unde descenderat.

A. Nam quadraginta,
postquam surrexerat,

5. Diebus sacris
confirmans pectora

6. Apostolorum, pacis cara
relinquens oscula,

7. Quibus et dedit potestatem
laxandi crimina,

8. Et misit eos in mundum
baptizare cunctas animas

9. In patris et filii et

sancti spiritus clementia ;

10. Et convescens
praecepit eis,
ab Ierosolyma

11. Ne abirent,

sed exspectarent
promissa munera.

12. Non post multos enim dies
mittam vobis
spiritum paraclitum in terra,

13. Et eritis mihi testes
in Ierusalem,
Iudaea sive Samaria."

14. Et cum hoc dixisset,
videntibus illis
elevatus est, et nubes clara

15. Suscepit eum ab
eorum oculis ;
intuentibus illis aera,

16. Ecce, stetere
amicti duo viri
in veste alba

17. Iuxta dicentes:
"Quid admiramini
caelorum alta?

18. Iesus enim hic, qui assumptus
est a nobis ad patris dexteram,

19. "Ut ascendit, ita veniet

quaerens talenti commissi lucra."

20. O Deus maris, poli, arvi,
hominem, quem creasti,
fraude subdola

21. Hostis expulit paradiso
et captivatum secum
traxit (ad) tartara.

22. Sanguine proprio
quem redemisti Deo,
Illuc et provehis,
unde prius corruit
paradisi gaudia.

23. Da nobis, quaesumus,
sempiternam requiem,
Iudex cum veneris
iudicare saecula,
in sanctorum patria,

24. In qua tibi

cantemus (omnes) Alleluia.