XXIX.

Dominica secunda post festum Trinifalis,

ORATIO, Homo quidam fecit coenam magnam .

Domine Jesu Christe, homo singularis, ineffabilis conditor matris : qui post opus creationis et formationis in opere recreationis per opus transformationis, fecisti nobis coenam magnam : magnam quinque panum refectione, scilicet, exsecutione divinae voluntatis, consolatione divinae promissionis, virtute orationis, sacramentorum efficacia, et cibo tua? carnis : magnam figurarum antiquitate, figurae et rei conjunctione, figurarum diversitate, instituentis charitate, credentium fide : magnam quantum ad conficientem, quantum ad id quod conficitur, et quantum ad digne sumentem, ut comedamus sacramentaliter, intellectualiter, et spiritualiter. Igitur ne vocati venire impediamur per villam terrenae occupationis, per juga boum quinque corporalium sensuum, aut per uxorem carnalis concupiscentiae : mitte servos tuos ordine, primo qui nos vocent per timorem qui de veteri vita exire nos faciat : secundo etiam per adversitatem nos ad coenam intrare compellant, ne per iram ture aeternae indignationis separemur in praesenti a coena contemplationis, et in futuro a coena tuae manifestae visionis. Amen.