Oratio, quam dicere solebat, quando sacerdos sanctissimum Christi corpus elevabat.

Domine Deus, coelestis Pater, respice in hanc gloriosam Christi tui faciem et miserere mei et caeterorum peccatorum, pro quibus benedictus Filius tuus et Dominus noster dignatus est mori et pro quorum salute et consolatione in sancto sacramento altaris nobiscum voluit remanere, cum quo tu es Pater et Spiritus sanctus, qui unus es Deus et vivis cum Filio et Spiritu sancto in saecula saeculorum, amen.

Ad impetrandum divinum amorem oratio.

Absorbeat, quaeso Domine, mentem meam ab omnibus, quae sub coelo sunt, ignita et melliflua vis amoris tui, ut amore amoris tui moriar, qui amore amoris mei dignatus es mori, per temetipsum Dei Filium, qui cum Patre etc, amen.

Precatio, qua morbo affectus usus est.

Gratias tibi ago, Domine Deus, de omnibus his doloribus meis, teque, mi Domine, rogo, ut centuplum, si tibi Placuerit, addas, quia hoc erit mihi acceptissimum, ut affligens me dolore non parcas, cum tuae sanctae voluntatis adimpletio sit mihi consolatio superplena.