64. In Resurrectione DN

1. Refulget omnis Iuce mundus aurea,
Perfusus aether inrorat dulcedinem,
Astra, jucunda coeli luminaria,
Cingit per omne decus radiantia,
Distillat aer balsamorum guttulas.

2. Occasus, ortus, aquilo, septentrio,
Tellusque pontus, oceani limites,
Lati polorum jubilate cardines,
Fontes aquarum, flumina labentia,
Gaudete, campi, montium cacumina.

3. Surrexit, ecce, Dominus ab inferis,
Devicta morte cum triumpho rediit,
Victor iniquum spoliavit tartarum,
Claustra gehennae fregit et chyrographum
Mortis cruore diluit rosifluo.

4. Sol, schema mundi, decus coeli rutilum,
Delusit omne saeculnm meridie,
Texit globorum lampades nigredine,
Coelum tabescit, taetra nocte territum,
Languit orbis obsitus caligine.

5. Expavit arvum, tremuere maria,

Velum rescissum templi mox per medium,

Fissae deinde patuerunt silices,

Multa piorum surrexerunt corpora

De monumentis, dudum qui dormierant.

6. Ut vidit anguis immolatum vespere
Corporis almi sanctum sacrificium,
Quod mane coelum replevit odoribus,
Dolore multo saucius increpuit
Percussus agni mansueti vulnere.

7. Vidit in ara sacram crucis hostiam,
Sanguinis undam, laticem de latere
Sancto fluentem, saeculi qui crimina
Diluit, alti paradisi gaudia
Data latroni, frustra collo sibilat.

8. Felix refulsit tristia post sabbati
Dies sereno perlustrata lumine,
Quae sola cunctis antecellit diebus,
In qua redemptor surrexit a mortuis
Mundi superbo superato principe.

9. Venit Maria Magdalene sabbato,
Maria venit altera diluculo,
Ad monumentum portantes aromata,
Ut venientes corpus sacratissimum
Christi linirent reddenti chrismate.
10. Concussa tellus ab imo resiliit,
Terrore pulsa riguerunt marmora,
Invasit horror mulieres pavidas,
Ab ore namque monumenti lapidem
Dum sanctus ovans angelus revolveret.

11. Flentes at illae loquebantur mutuo:
Quis a sepulchri clauso nobis ostio
Magnum removet lapidem, quo Zmyrnea
Tingatur unda corpus, aromaticis
Litum respiret pretiosis roribus?

12. Angelus, ecce, Domini praefulgidus
Sedens in albis revoluto lapide
Illas refovit talibus alloquiis:
Quid vos in antris viventem cum mortuis
Quaeritis? ipse surrexit, ut dixerat.

13. En ecce locus, ubi fuit positus
Dominus, ite dicite discipulis:
Surrexit autem, Galilaeam petiit,
Destruxit eum, qui mortis imperium
Habebat, ante sicut ipse dixerat.

14. Ibant alacri pectore feliciter,
Occurrit illis Jesus, mundi gloria,
Mitis suavis ac desiderabilis,
Totus benignus, dulce desiderium,
Salus perennis aetemorum civium.

15. Spes namque mundi salutaris unica,
Fons, vita, virtus, sempiterna veritas,
Pietas ardens, omnis consolatio,
Vultu sereno solis super radio
Dicit: Avete, sanctis mulieribus.

16. Mors inimica se perisse doleat,
Mortua vita mortis regnum diripit,
Mors ultra illi jam non dominabitur,
Ovem reduxit ad ovile perditam,
In cruce totum renovavit saeculum.

17. Sit tibi Deo patri laus et gloria,
Sit crucifixo virtus et imperium
Sanctoque simul potestas spiritui,
Sit trinitati salus individuae
Per cuncta semper saeculorum saecula.