108. De beata Maria V.

1. O Maria, stella maris,
Medicina salutaris

Corporis et cordium,
Fons signatus, clausus hortus,
Via pacis, vitae portus,

Pauperis refugium.

2. In hac valle lacrimarum,
In hoc loco tenebrarum

Contra fraudes hostium
Nos custodi, nos defende,
Sis adiutrix et impende,
Quod est necessarium.

3. Gloriosa Dei mater,
Cuius natus exstat pater,

Patris unigenitus,
Cuius mentem praeparavit,
Cuius carnem praeaptavit

Utriusque spiritus.

4. Intercede pro peccatis
Apud fontem pietatis

Et misericordiae,
Fac nos vere paenitere
Et commissa sic deflere,

Dum tempus est veniae.

5. Omnis virtus te decorat,
Omnis sanctus te honorat

In caelesti patria,
Omnes gentes benedicunt
Et laudantes tibi dicunt:

Ave, plena gratia.
6. Propter plagas crucifixi,
Quas cruentas flens vidisti

Nostra pro miseria,
Fac nos digne te videre
Et videndo congaudere

In perenni gloria.

7. Iesu, fili summi patris,
Iesu, fili summae matris

Et intactae virginis,
Qui de caelo descendisti
Et descendens induisti

Veri formam hominis,
8. Genetricis pia prece
Nos a luto, nos a faece

Peccatorum ablue
Et concede vitam puram
Et da pacem permansuram

Et salutem tribue.