389. De s. Iulia Corsicana.

Ad Vesperas.

1. Causa, corona martyrum,
Deus, efficax omnium
Sexum fecit femineum
Sede potiri martyrum.

2. Si durat, quod est fragile,
Nobis est admirabile,
Sic in sexu muliebri
Durities martyrii.

3. Maiorem decet fieri
Audaciam martyrii,
Si quando sexus fragilis
Laude gaudet certaminis.

4. Carthaginensis Iulia
Tormentis imperterrita
Minas non timet mulier,
Quas crudus agit arbiter.

5. In omnibus christicola
Ut probaretur Iulia,
Crucis subit patibula
Christi regnans vestigia.

6. Cruci configi meruit,
Quia per crucem credidit
Certam salutem fieri
Omni humano generi.

7. Pretiosa est passio
Et admiranda ratio
Ancillam sui Domini
Damnari morte parili.

8. Nunc laetatur perpetui
. Spem consecuta praemii,
Una prudentum virginum
Psallit in choro martyrum.

9. Beata(m) martyr Iulia,
Nostrum magna fiducia,
Tuis precibus impetra
Nostra deleri crimina.

10. Deo sit laus et gloria,

Per quem laudantur omnia ;
Laudes, quas tibi promimus,
Nobis succurrant ocius.

Ad Matutinas.

1. Adest beatae virginis
Sacer natalis Iuliae,
Quo caelum scandit inclitis
Martyr onusta praemiis.

2. Infanda nam barbaries
Praedaverat Carthaginem,
Ex qua colendam virginem
Eusebius sortitus est.

3. Sed virgo Christi Iulia
Iugo carnali subdita
Almam pudico pectore
Fidem servabat sedule.

4. Pallebat os ieiunio,

Vigebat mens iuncta Deo,
Non vincula, non verbera
Pavebat Christi vernula.

5. Saxo Felix, dux improbus,
Puellae temptat animum,
Armis munita fortibus
Nescit timere perfidum.

6. Haec mortis in eculeo
Flagris attrita concinit,
Crucis nixa patibulo
Hostis tropaeum sustulit.

7. Et bonum finem tribuens
Columba valde splendida
Ex eius ore prodiit,
Viam polorum petiit.

Ad Laudes.

1. Beata namque Iulia,
Ad cuius urnam sistimus,
Nobis adest cum gaudio
Omni colenda tempore.

2. In hac die sed maxime
Hoc prosequi nos condecet,
Qua membra linquens terrea
Perrexit ad caelestia.

3. Exemplaque salubria
Nobis reliquit plurima,
Quae si sequamur strenue
Nos deviare non sinent.

4. Viri, puellae, parvali
Morbis gravati pessimis
Eius rogatu redditi
Sunt sanitati pristinae.

5. Laus, honor, virtus, gloria
Deo patri et filio,
Sancto simul paraclito
In saeculorum saecula.

Ad 2. Vesperas.

1. Beata virgo Iulia

Mundana linquens omnia,
Christi sequens vestigia
Transivit ad caelestia.

2. Ex nobili familia

Martyr processit Iulia,
Oriunda fuit Carthagine,
Splendore grandis Africae.

3. Devicta tunc Carthagine
A barbarorum rabie
Insulam ducta Corsicae
Permansit brevi tempore.

4. Nam, quod praefectus voluit
Eusebius, hoc renuit,
Decepto tandem callide
Respondit coram praeside:

5. Cur, Felix Saxo, desipis,
Quid vana verba loqueris?
Non me revolvunt munera
Nec saeva mortis vulnera.

6. Orare sprevit idola
Ancilla Christi Iulia
Iussa torqueri variis
Tormentis et suppliciis.

7. Dilaceratis artubus,
Ab omni parte carnibus
Graphiis atque virgulis
Mamillis quoque virginis,

8. Pendens crucis patibulo
Preces mittit altissimo:
Animam meam suscipe,
Magnae Deus potentiae.

9. Ei Christus apparuit,
Cum diras poenas sustulit,
Virtutum parans praemia
Beata caeli gaudia.

10. Emissus Christo spiritus
Sanctorum choris iungitur
Cum triumphali laurea
Caelorum scandit sidera.

11. Tulerunt corpus monachi
Ab angelis praemoniti,
Gorgone parant tumulum,
Christe, redemptor omnium.

12. Ornavit eam veritas

Spesque, fides et caritas,
Virtutes et nobilitas,
O lux beata trinitas.

13. Vexillum portat virginum,
Sanctarum quoque martyrum,
Florescit sicut lilia
Inter sanctarum agmina.

14. Omnes sanavit languidos
In Christi fide fervidos
Ad corpus sanctae virginis
Consors paterni luminis.

15. Sit trinitati gloria,

Quam deprecatur Iulia,
Quae donet nobis gaudia
Per infinita saecula.

In translatione.

1. Rex Lombardorum Flavius
Illustris Desiderius
Fundavit hoc coenobium
Et sacravit monialium.

2. In salvatoris nomine,
Virginis quoque Iuliae,
Arsae reginae precibus;
Exsultat caelum laudibus.

8. Sacratum corpus Iuliae
Translatum iacet Brixiae,
Ornavit illud splendide
Lucis creator optime.

4. Sanctorum multa corpora
Secum traduxit socia
Et martyrum et virginum,
Deus, tuorum militum.

5. Summo locavit gaudio
Regali monasterio
Dotato magno munere
Honore sanctae Iuliae.

6. Felix laetetur Brixia
Dona tot ferens inclita.
Sanctorum tenet corpora
Ducta per mundi climata.

7. Sit trinitati gloria etc.