EXPOSITIO TEXTUS.

Talium autem, etc.

Deinde comparat sanctos morientes malis, dicens, quod nullus malorum moritur sicut sancti moriuntur : sanctus enim vir veniens ad mortem in qua finiuntur sua certamina, impletur gaudio, sanctam resurrectionem exspectans, et tunc illi qui sunt sibi familiares ut consortes divinae vitae, reputant eum. beatum, quia venit ad palmam quam optavit, de quo gratias Deo referunt, optantes et ipsi ad similem venire finem, et portant mor-

tuum ad Episcopum, qui est loco Dei, sicut ad accipiendum praemium a Deo pro bonis quae gessit : et Episcopus suscipit eum cum cantu, et facit ea quae sunt facienda circa dormientes, ut post dicet.

Talium, scilicet coinquinationibus plenorum, ipse, scilicet sanctus vir. Iterum generationis, id est, iteratae factionis, scilicet resurrectionis, divinae, id est, divina virtute factae, non naturali, ad viam, mors enim est via in resurrectionem, quia non resurgit qui non mortuus est, et quia ex glorificatione animae venitur in gloriam corporis. Dormientis, id est, mortui secundum divinam familiaritatem, non secundum carnalem cogitationem, ipsum qui est, scilicet mortuum, qui utcumque est, vel qui vere incipit esse propter incorruptionem, beatificant, id est, beatum reputant, ad palmi ferum finem, id est, ad mortem, in qua palmam pro victoria accipiat, optate, secundum eorum desiderium, causali, id est, Deo qui est causa omnis victoriae, secundum legem, id est, secundum ordinationem hierarchicam. .

6