DIVISIO ET EXPOSITIO TEXTUS.

A. Et post illam vero, etc.

Hic ostendit haec tria esse in hierarchia humana quantum ad veterem legem. Et primo ponit modum traditionis hujus hierarchiae. Secundo ostendit quae sit ejus teleta, ibi, Habet autem, etc. Tertio, mystas, ibi, Manuductor es autem, etc. Quarto, imbutos, ibi, Illud sanctum tabernaculum, etc.

Dicit ergo primo, quod Deus dat sua dona nostrae hierarchiae inferiori modo quam Angelis, quia in symbolis : ita tamen quod illis qui erant in veteri lege, quasi rudibus et parvulis in divina cognitione, tradiderit hierarchiam habentem veritatis spiritualium contemplationem obscuris signis et allegoriis, ne lux aperta infirmos oculos potius offenderet quam juvaret.

Post illam, id est, inferiori modo ab illa, crassis, id est, rudibus, qui non nisi materialia et grossa capere poterant. Alia translatio, " parvulis ", scilicet intellectu, secundum eloquium. I ad Cor. III, 1 : Tamquam parvulis in Christo, etc. Melius, ad Gal. IV, 3 : Cum essemus parvuli, sub elementis mundi, etc.

Juxta legem characteribus verorum, id est, per quaedam signa veritatis revelandaae in nova lege.

Imaginibus, id est, figuris, principalium exemplorum, id est, spiritualium intellectuum : longissimis, id est, remotissimis, quia eorum sacramenta signa erant nostrorum, quae propinquius spiritualia significant, tamquam Christi continentia occultam contemplationem.In ipsis, id est, secundum proportionem ipsorum : innocue, loquitur per similitudinem corporalis visus, qui corrumpitur a superexcellenti luce.