417. (1. ) Encomium Beatae Mariae.

1. Ave, virgo, mater Christi, Quae pudore meruisti

Dici phoenix virginum; Ave, virgo, cuius fructus Nobis dedit finem luctus

Et lamenti terminum.

2. Ave, virgo speciosa, Cuius laudi neque prosa

Neque metrum sufficit; Ave, virgo, mali meta, Vena vitae, per quam theta Taetrae mortis explicit.

3. Ave, virgo gloriosa,

Quae commentum es et glosa

Scripturae propheticae, Cuius glosa facit nudum, Quod velatum erat dudum

Literali cortice.

4. Ave, virgo, caeli clavis, Ave, novis nova navis

Onerata mercibus, Per quam plena plenis velis Est allata lux de caelis Caecis et errantibus.

5. Ave, gemma puellaris, Ave, clara stella maris,

Ave, capsa numinis, Ave, lampas et laterna, Quam accendit lux superna,

Fax aeterni luminis.

6. Ave, virgo, cuius venter Sigillatus diligenter

Fetu novo tumuit; Sine poenis et tortura Splendor patris et figura

De te nasci voluit.

7. Ave, virgo, verbi zeta, Caste casto flatu laeta,

Non immundo semine; Tibi digne damus odas, Quae cum Deo limum nodas

Et matrem cum virgine.

8. Ave, virgo, verbi cella Carnis condens sub nubella

Deitatis radium; Ave, virgo, Dei theca, Per quam lusca, lippa, caeca

Mens habet collinum.

9. Ave, virgo, gurges mellis, Quae fel priscae procul pellis

Mortis et maestitiae, Quae coniungis Deo limum Et cum summo suis imum Acu providentiae.

10. Ave, virgo, mortis serra, Cuius venter est acerra

Caelestis aromatis; Ave, virgo, quam sacravit, Fortunavit et formavit Virtus almi pneumatis.

11. Ave, virgo gratiosa,

Sola praegnans et ventrosa

Sine maris opere, Firmamentum infirmorum Tollens onus peccatorum

Pio ventris onere.

12. Ave, virgo, mentis dulcor, In qua reus et exsul cor

Fundat, figit, anchorat, Quam in morbo, quam in mari, Quisquis studet liberari,

Studiose memorat.

13. Ave, virgo, quam in artis Christiani mortis Martis

Invocant terroribus; Ave, prudens et cordata, Per quam salus profligata

Redditur credentibus.

14. Ave, caeli thymiama, Cuius odor, cuius fama

Summa ferit sidera, Cuius nomen aures mellit, Cum prolatum has percellit,

Et pigmentat aera.

15. Ave, pelta peccatorum Et asylum elegorum,

Immo refectorium; Ave, sporta pane plena, Christi ciclas, Christi lena,

Christi dogmatorium.

16. Ave, per quam uniuntur, Coniugantur, coniunguntur

Virginali fibula Agnus leo, via finis, Splendor nubes, numen cinis,

Radius et nebula.

17. Ave, cuius est ex alvo Sed pudoris flore salvo

Verbum patris editum, Sine mare marem paris, Non per germen sata maris,

Sed per sanctum spiritum.

18. Ave, nubes penetrata Phoebi flammis et ornata

Deitatis iride, Quae sub umbra lucem celas Et aeternum verbum velas

Nostrae carnis chlamyde.

19. Ave, vertex honestatis, Ave, monstrum sanctitatis,

Ave, vitae scatebra, Ave, pinna puritatis, Ave, thoral trinitatis,

Ave, lucis latebra.

20. Ave, virgo, Dei reda, Dei fanum, in quo taeda

Caelestis accenditur, Tu salutis es minera, Clava, cuspis et machaera,

Qua mors caesa moritur.

21. Ave, per quam surgunt hi, qui Ceciderunt per antiqui

Serpentis astutiam; Ave, quae per castum thorum Carnis ius et logicorum

Fallis consequentiam.

22. Dicunt enim sequi tales, Quibus favent naturales:

Haec est mater, igitur Virum novit et est facta; Sed Maria prolem nacta

Dicit, quod non sequitur.

23. Dicant illi, quod, si caret Planta succo, semper aret,

Arens nunquam pullulat; Sed intacta virgo Christum Pariendo nodum istum

Solvit et effibulat.

24. Ave, parens, partus morem Partu mutans, nam dolorem

Partui postposteras, Florem paris, sed in partu Neque florem nec iubar tu

Pudoris obliteras.

25. Dolor matris prolongatur, Donec proles patiatur,

Ut simul parturiant, Quia probra patientis Sputa, clavi, crux parentis

Animam digladiant.

26. Ave, virgo singularis, Apotheca salutaris

Pigmenti thearchici, Ave, cuius cor a cunis Consecratum erat prunis Amoris exstatici.

27. Ave, virgo, vas verbale Decus plantans matronale

Virginis in stipite; Ave, cuius ventris promus Et virtutis sacrae domus

Deo gaudent hospite.

28. Ave, virgo laeta prole, Quam amictam vidit sole

Iohannes deividus, Cuius plantis est substratus Lunae globus, ut praefatus

Astruit altividus.

29. Ave, virgo, morum schola, Quae naturae nostrae stola

Trabeasti filium, Praeparasti Deo thorum Et actorem angelorum

Fecisti novitium.

30. Ave, mater, virgo pura, Leti letum et censura,

Melos musae tristibus; Ave, gaude, virgo dulcis, Laxis fibris et hiulcis

Collaudanda faucibus.

31. Ave, gemma feminarum, Quae prae cunctis gratiarum

Invenisti copiam, Pulchrum in te fecit zeuma, Cum univit verbo pneuma

Duplicem substantiam.

32. Ave, virgo, pulchra tota, Cuius nulla naevi nota

Pudorem deliliat, Ave, novi musti crater, Ave, parens, ave, mater,

Quam Venus non vitiat.

33. Ave, crater, cuius mustum Illum fidum, illum iustum

Petrum debriaverat, Haustu cuius ausum nactus Novus verbi praeco factus

In verba proruperat.

34. Ave, caeli decor, ave, Dei templum et conclave,

Cuius in praeconio Omnis altus scriba iacet, Omnis rhetor acer acet

Et sordet eloquio.

35. Ave, cuius pia prece Peccatorum tersa faece

Rei gaudent venia, Quos confractis inferorum Claustris transfers ad caelorum Stellata palatia.

36. Ave, novum vas humanas Aquas prius malesanas

Dei sale condiens; Ave, Deum in secretum Thorum trahens et concretum

Ex abstracto faciens.

37. Ave, cuius pia dextra Sordescentes intus, extra

Pie solet tergere Et deterso culpae caeno Serenatos in sereno

Regno Dei ponere.

38. Ave, virgo, virga lesse, Quam caelestis indefesse

Laudat chorus curiae, Et succumbunt omnes Musae Laudatorum sub diffusae

Pondere materiae.

39. Ave, virgo, mater, gaude, Cuius in canenda laude

Par est Cherub cherilo, Satis culta sine cultu Fratrem Phoebes vincis vultu Rutilantem rutilo.

40. Ave, victrix hostis saevi, Claudens Deum claustro brevi,

Magnum parvo metiens, In frumentum carnis foenum Et in aurum vertis caenum

Verbo carnem uniens.

41. Ave, cuius speciei Comparata lux diei

Sudae nox est horrida; Phoebus funus, caelum caenum, Luna limus, mel venenum,

Favus coloquintida.

42. Ave, casta sponsa Dei, Quae beatae faciei

Nive nives superas, Quae per vultum praefulgorum Aquilinam angelorum Aciem reverberas.

43. Ave, virgo, vas argutum Maiestatis, quae virtutum

Summas carpis semitas, Expers labis, expers sordis, Quia tui chordas cordis

Dei tendit caritas.

44. Ave, virgo, quae diurnam Facem vincis et nocturnam

Radiosa facie, Tui sacri ventris cista Placet Christo, quia crista

Cares arrogantiae.

45. Ave, thymum, caltha, rosa, Vitis ferax et frondosa

Palmaque vermicoma, Ave, fornax, in qua flagrat Et flagrando magis fragrat

Caritas ignicoma.

46. Ave, doxa virginalis, Vas arvinae spiritalis,

Gratiae lardarium, Strena pacis, arrha vitae, Maiestatis infinitae Subtile compendium.

47. Ave, caeli brevis apis, Quae de Dei sinu rapis

Redolentem flosculum Et de flore sugis favum, Gustu cuius ad octavum

Pervenitur saeculum.

48. Ave, mater, ave, virgo,

Quem in summo vitae pyrgo,

Quisquis credit, invocat, Quam, qui motor est caelorum, Super trinam angelorum

Ierarchiam collocat.

49. Ave, mater, quam in throni Dignitate superponi Voluit caelicolis Is, qui frenat et aurigat Caeli raptum et qui ligat Elementa symbolis.

50. Ave, virgo, quae tonantem Lacte nutris et lactantem

Stricta cingis fascia; Ave, semel, ave rursum, Quae per carnem sistis cursum

Carnis ad declivia.

51. Sicut unda praeceps fluit, Sic corruptae carnis ruit

Moles ad flagitia, Sed, dum unis carni Deum, Carnis aquam in Lyaeum Vertis ventris hydria.

52. Ave, de qua Deo gratum Est numisma fabricatum,

Quo mundus redimitur, Praeter morem usitatum, Non per follem, sed per flatum

Haec moneta cuditur.

53. Ave, per quam fit passivum Verbum illud, quod activum

Erat ab initio, Ave, per quam serpens ille, Qui maeandros serpit mille,

Tollitur de medio.

54. Ave, virgo, mater alma, Quae divinum es agalma,

Nidulus et camera, Cuius fructu vegetamur, Vegetati veneramur

Viscera deifera.

55. Ave, digna Deum ferre, Cuius sancta caelum terrae

Castitas conterminat, Cuius cor in caelo fixum Et amoris igne frixum Iesum semper ruminat.

56. Ave, pura virgo, mater, Ave semel, bis, ter, quater,

Ave mille vicibus, Ave, virgo comis, mitis, Ave, mater exquisitis

Extollenda laudibus.

57. Ave, mater, maestis prompta, Quam non possunt satis compta

Laudare facundia Tot Marones, tot Sibyllae, Quot sunt vasti maris stillae,

Conflantes ingenia.

58. In te primum ultimatur, Primitivum derivatur;

Talis derivatio Non est nota Prisciano Nec Maroni Mantuano

Nec vati Maeonio.

59. Tu mortis es ablativa, Quia prolis genetiva

Sine culpa genitae, Tu fletus es abstersiva, Restauratrix et dativa Libertatis perditae.

60. Ave, mater et puella, Quae captivos a dicella

Servitutis liberas Et in lucis regione Superato Pharaone Superis adlateras.

61. Ave, cama Iesu Christi, Quae mortalis ostendisti

Nobis vitae speculum, Quae latoris es fiscella Novae legis et cistella,

Currus et vehiculum.

62. Tu lechytus es olivi, Tu vitalis via rivi, Dei brevigerula, Tu columna clinicorum, Tu celeuma naufragorum Et secunda tabula.

63. Tu vas mellis, lactis uter, Scaturigo, fons et luter

Purgativus sordium, Christi lectus et lectica, Sponsa, mater et amica,

Velum et tentorium.

64. Tu fons es, qui non arescis, Tu flos es, qui non marcescis,

Paradisi lilium, Tu nutantis es bacillus, Tu tonantis es pulvillus Et reclinatorium.

65. Tu portella procis clausa, Salus aegris, fessis pausa,

Tristibus tripudium, Sabbatismus fatigatis Et morbosis sanitatis

Es electuarium.

66. Tu naucleri nostri linter, Tu catella sive spinter

Luto iungens figulum, Tu pastoris es magale, Qua fideles ad vitale Minat oves pabulum.

67. Ave, virgo, norma morum, Ave, lima vitiorum,

Ave, serra sordium, Ave, pyxis deitatis, Ave, summae maiestatis Sacrum breviarium.

68. Ave, virgo pia, quae nos Proseuchantes et egenos Suscitas de pulvere; Nostra nostrum herum hera Salva tamen alvi sera Meruisti parere.

69. Ave, cuius pia prole Peccatores sunt a mole

Peccatorum liberi, Quae potenti caelos palmo Concludentem brevis almo

Vallo vallas uteri.

70. Miro quodam argumento Cum extremis adiumento

Virginali medio Minus infers de maiori, Sed et maius de minori;

Felix haec illatio.

71. Ave, virgo, cuius rore Mundus ante florens flore

Redivivo viruit, Ave, mater, mater, ave, Cuius dirae mortis a vae

Partus nos eripuit.

72. Ave, stella matutina, Quae nutantes in labina Vitae regis lubricae; Ave, virgo, quam super se Recognoscunt tersam tersae Virtutes uranicae.

73. Ave, templum Salomonis, Ave, vellus Gedeonis, Ave, verbi casula, In qua Deus incarnatur Ut ansatus teneatur Nostrae carnis ansula.

74. Ave, virgo gloriosa,

Cuius semper est rimosa

Manus indigentibus; Tu lusco lux, tu claudo pes, Aerumnosis opem, opes

Influis inopibus.

75. Ave, virgo, quam turbavit Ille, qui te salutavit

In conclavi, Gabriel; Per te rectus fit obliquus, Per te puer fit antiquus,

De quo scripsit Daniel.

76. Ave, virgo columbina, Sedes, aedes, officina

Grata Dei filio, Cuius cordis in asbesto Caritatis fax honesto Flammavit incendio.

77. Ave, virgo, verbi parens, Ante partum et post carens

Corruptelae notula, Cuius laudes minus fide, Quamvis manu tacta Midae,

Personaret fistula.

78. Ave, nostris spes, Maria, Languidorum salus, quia

Salutis confectio, Qua languori subvenitur, Tui ventris invenitur In antidotario.

79. Ave, virgo, casa dia, Quae dolentis es Thalia,

Pauperis refugium, Ave, virgo, Clio maestis, Quae canalis es caelestis

Roris et impluvium.

80. Laudes tantae matris Maro Non araret celte claro

Neque Titus Livius: Hic Homerus est exlinguis Et Minerva flatu pinguis,

Hic est traulus Tullius.

81. Ave, veha nostri ducis, Ave, gleba, quae producis

Gramen sine palea, Vulnerasti crine bello Sponsum tuum et ocello Facieque lactea.

82. Ave, virgo, per quam sospes Fit morbosus tuus hospes,

Per quam exsul remeat; Ave, per quam est subacta Mors immitis, quae compacta

Solvit et disuneat.

83. Ave, luna semper plena

Flammis Phoebi, quam terrena

Pila non ecclipticat. Quam sanctorum chorus totus Pronus, supplex et devotus

Cernuusque praedicat.

84. Ave, lampas caeli suda, Cuius sudus fulgor uda

Nunquam nube tegitur, Cuius vultus vibramen dat, In quam Cherub ut intendat,

Connivere cogitur.

85. Ave, caste nacta prolem, Supergressa sola solem

Feminina specie, Perspicacem visum vincis Aquilarum, immo lyncis,

Oculorum acie.

86. Ave, pulchro pulchra crine, Dente, labris, o divinae

Maiestatis mantica Pulchra mammis, pulchra

fronte, Pulchra foetu, tamen non te Venus urit lubrica.

87. Ave, pulchra pelle pulpa, Fecundata sine culpa,

Sine viri semine, Ave, cuius pulchrimenti Totus splendor firmamenti

Vincitur vibramine.

88. Ave, pulchra naso, malis, Pulchra dorso, pulchra palis

Dentiumque serie, Pulchra pulchram filiorum Formam vincis et olorum

Olorina facie.

89. Ave, pulchra colomellis Et gingivis et labellis,

Pulchro pulchra cilio, Ave, cuius calcem clare Nec centenni commendare

Sciret Seraph studio.

90. Ave, pulchris pulchra suris, Pulchra pulchri nive cruris,

Musculis et tibiis, Pulchra plantis, pulchra talis, Umbilico, coxis, alis, Nervis et arteriis.

91. Ave, pulchra fauce, nare, Cuius nemo caraxare

Potest formam graphio, Pulchra nive digitorum, Scapularum, lacertorum

Et interscapulio.

92. Ave, pulchra flexu fagi

Vincens trica, quidquid Tagi

Fulvum ripae redditur Ave, pulchra per quam, in qua Deitatis lux propinqua Pulchre nobis oritur.

93. Ave, pulchra lacte colli, Nullo luxu, nulla molli

Fracta petulantia, Cuius castae sanctitatis, Cuius sanctae castitatis Alternantur lilia.

94. Ave, pulchris pulchra costis, In quam ne quis urgens hostis

Notellam impungeret, Cuius solis et aurorae Faber fabri stilo flore

Solus laudes pingeret.

95. Ave, pulchra lynceorum, Immo magis limpidorum

Oculorum acie, Pulchra prole gravidata Nullo tamen urticata

Pruritu lasciviae.

96. Ave, scopa, qua purgatur Et qua procul relegatur

Prisca mundi foeditas; Per te rectum circulatur, Dum naturae copulatur Infimae divinitas.

97. Tuo pio partu recta Naturarum imperfecta

Consummatur linea, Dum supremus fit extremus Et extremus fit supremus

Sumpta carnis trabea.

98. Ave, virgo, schema poli, Quam novercam habent soli,

Qui iacent in sordibus; Ave, fornax caritatis, Clara colo castitatis,

Claris clara moribus.

99. Ave, vivi panis pera,

Conditorem condens stera

Trinae mundi machinae: Ave, caste fecundata, Nulla carnis titillata

Lasciva libidine.

100. Ave, virgo, per quam rei Consequuntur iubilaei

Sempiternam feriam; Ave, per quam homicidae, Paricidae, patricidae Redeunt ad patriam.

101. Ave, templum summi regis Et latoris novae legis Altare turicremum; Ave, cuius faber poli Renovavit sibi soli Virginalem eremum.

102. Ave, mater et virago, Quae vestisti carnis sago

Vestientem lilia; Ave, per quam Deus nascens Ex antiquo puerascens

Vinctus est initia.

103. Ave, summi regis ostrum, Ave, virgo Deum nostrum

Casto lactans ubere, Partu gaudens glorioso, Quia nunquam fastuoso

Tumuisti tubere.

104. Ave, per quam sol saccatur, Per quam Deus humanatur,

Per quam Deus panditur, Per quam luctus limitatur, Per quam dolor obelatur,

Per quam risus redditur.

105. Ave, casta sponsa Dei, Quae pulsata pandis ei

Tuae mentis pessulum, Dulcis dulce das responsum Et admittis dulcem sponsum

Ruentem in osculum.

106. Ave, pluta caeli nimbo,

Udas orcum et a limbo

Sanctos patres eruis;

Huius mundi cataclismo

Foedos vitae barbarismo

Mundas, purgas, abluis.

107. Fons es lactis nunquam arens Puteusque fundo carens

Et abyssus mellea, Paradisi fragrans rosa, Vestis verbi non corrosa Corruptelae tinea.

108. Tui mellis cataclismus Salutaris est baptismus,

Quo mundus abluitur; Tuum nectar est medela, Qua peccatum et sequela

Peccati detegitur.

109. Ave, via veritatis

Et amussis aequitatis,

Ave, recti regula, Sanctitatis ordinale, Novum morum doctrinale, Novae vitae formula.

110. Ave, mater et ancilla,

Summi regis quae papilla

Tuum pascis pabulum,

Lacte pascis te pascentem,

Ventre claudis te claudentem,

Tuum geris gerulum.

111. Deus ad te salutandam Et salute gravidandam

Suum mittit militem; Tu respondes verbis gnaris, Visco carnis puellaris

Capis Dei alitem.

112. Tu caelestis es hirudo Favum sugens, plenitudo

Cuius non ebibitur; Sugit Deus favum tuum, Et tu sugis favum suum,

Melle mel rependitur.

113. Ave, nostra mediatrix, Ave, cuius tumet matrix

Sine viri copula, Tu pistrinum es abundum, In quo Deus munda mundum

Panem pinsit pinsula.

114. Ave, virgo Deo placens, De mundanis muta, tacens,

De divinis garrula; Quidquid habet in thesauris Deus dives, pauper hauris Virginali situla.

115. Ave, mater praevignorum, Ave, bibax divinorum

Fluentorum spongia, Tu es rubus ardens igni Iuventutis, sed insigni

Salva pudicitia.

116. Ardet in te calens aetas Iuventutis, sed tu metas

Iuveniles praeteris, Nam nativus in te calor Flagrat, sed te nullus squalor Foedae foedet Veneris.

117. Ave, cuius lanae floccum In regale vertit coccum,

Qui floccat et fulminat; Ave, per quam spoliatur Mortis carcer et is datur,

Qui mortem exterminat.

118. Ave, virgo, quia per te Portae caeli sunt apertae,

Per te caelum aeneum Emollitur et mollitum Rorem fundit concupitum

Et madorem melleum.

119. Ave, quae nos a draconis Imposturis et leonis

Eruisti rabie; Vivi panis te canistrum Confitemur et registrum

Totius ecclesiae.

120. Ave, per quam fit creator Creaturae ministrator,

Dominus mancipium, Rei iudex rei Iesus, Rhetor primus puer blesus,

Verbum participium.

121. Ave, virgo, mortis frenum, Plenum, immo superplenum

Vitae promptuarium, Ave, mater, arx timenti, Quae vitalis es frumenti

Vitale granarium.

122. Ave, per quam mors mordetur, In qua tota continetur

Annona fidelium, Is, qui caelos fabricavit, Tuum sibi dedicavit Ventrale palatium.

123. Ave, virgo, quae paventi Pax es et fons sitienti,

Flenti facitergium, Tu virtutis es exemplum, Dei penus, Dei templum Et gazophylacium.

124. Ave, per quam insons reus Et per quam fit noster Deus

Noster convicaneus, Per te magnus minoratus, Per te papa fit legatus,

Primas suffraganeus.

125. Per te fit sol hypogaeus, Dum de caelo lapsus Deus

Carnis toga tegitur; Sic noctescit, sed psalmista Teste sicut dies ista

Nox illuminabitur.

126. Fulgor solis aeternalis Umbra glebae virginalis

Involutus conditur,

Nulla tamen hac eclypsi

Pulchritudo vel lux ipsi

Cynthiae detrahitur.

127. Per te leo fit agnellus, Dominator domicellus

Et antiquus pusio; Tu de colle facis callem, De praerupta monte vallem

Et viam ex invio.

128. Sol in sacco clanculatur Et ventrali trutinatur

Statera divinitas, Lumen limo temperatur, Deitate penulatur

Mortalis infirmitas.

129. Ave, virgo, vas pudicum, Ad quam auris per posticum

Venit rex altissonus, Cuius pectus clipeavit Et ab hoste defensavit Increatus trigonus.

130. Deus pater gignit natum, Qui cum patre spirat flatum,

Ecce, scutum trigonum ! Istud scutum te, Maria, Contra tela tuit tria

Mundi, carnis, daemonum.

131. Dum te laudo, mater Dei, Verecundor propter mei

Sensus scabri sairosim; Nam nil ago te laudando, Sed rem grandem defalcando

Pecco per tapeiussim.

132. Deus in te se minorat, Minoratus te maiorat

Sanctitatis apice, Quam dum conor commendare, Nihil loquor in tanta re,

Sed cornicis ethice.

133. Omnes caeli philomenae Laetabundo tibi plene

Dulces cantant modulos; Sed succumbit harmonia Quia vincis, o Maria,

Tanti meli titulos.

134. Cum non possis laude claudi, Te laudando tuae laudi

Vereor detrahere, Quam non potest Cherub chelys Digne dignis stilis, melis

Digniter attollere.

135. Omnis aetas, omnis sexus Inclinatus, curvus, flexus,

Omnis cosmi natio, Omnis caeli symphonista Te collaudat, sed non ista

Sufficit laudatio.

136. Tibi laudes curvae, pronae, Tam puellae quam matronae

Senesque cum pueris Phono fundunt indefesso, Quas virtutum inaccesso Phono supergrederis.

137. Nec Homerus neque Maro, Virgo clara, stilo claro

Laudes tuas caneret, Immo neque Gabriel te Digna musa, digno celte

Lucubrando pingeret.

138. Ave, cuius in figura

Potens plus quam ars natura

Descripsit ingenium, Sed natura succumbente Dei patris ars intente Complevit negotium.

139. Ave, cuius pulchritudo

Plus excellit, quidquid cudo, Quam lux solis faculam: Ergo, qui me laudatorem Laudum leget et scriptorem, Irridebit ululam.

140. Ave, virgo, quae candore Nives vincis et decore

Plus, quam corvos lilium, Cuius vultu sepelitur, Quidquid splendens invenitur

Infra Dei radium.

141. Quae candore tanto cluis, Esto nobis, servis tuis,

Clemens et propitia, Rumpe viles Evae netus, Nec nos saltus ille vetus

Arceat a gloria.

142. Ave, virgo reverenda, Sine naevo, sine menda,

Luna sine cornibus, Tu, quae prava sunt, emenda, Claudis gressum et lumen da

Caecis, risum tristibus.

143. Virgo pia, virgo lenis,

Quae dedisti calcem threnis,

Opem nobis tribue Et in huius vitae salo Naufragantes nos a malo Tempestatum erue.

144. Felix tellus ingravata,

Sed nec scissa nec sulcata

Rusticani vomere, Captiones eius cassa, Qui nos hamo, reti, nassa

Nititur decipere.

145. Virgo, staurum perditorum Et medela languidorum Lyraque lugentium, Servum tuum, qui te balbo Laudat ore, fac in albo Scribi triumphantium.

146. Virgo munda, mundi vita, Concha, de qua margarita

Pretiosa nascitur, Miserere tuo servo, Qui peccati tentus ervo Iesum lente sequitur.

147. Virgo, nutrix orphanorum, Virgo, parma pavidorum

Et aegis egentium, Tuum quaeso vel ocellum Ad curvosum et misellum

Converte mancipium.

148. Virgo, tuam tuo servo, Qui virtutis caret nervo,

Dextram peto porrigi, Quando labor, esto prope, Cuius fulcro, cuius ope

Lapsi solent erigi.

149. Virgo, verbi genialis, Tutis tue tuum alis Et extento brachio, Trahe tuum post te sursum, Fausto falsae vitae cursum Claudens completorio.

150. Scelus meum et peccamen Recognosco, lente tamen

Hoc deflere satago, Irretitus sum peccatis, Sed de tuae pietatis

Vasto fido pelago.

151. Mentem meam premit tremor, Cum attendo, quibus premor

Et quot malis sordeo, Memor horum in spe nuto Tui memor te saluto

Et spem mihi spondeo.

152. Per te servo tuo detur, Ut hymnizet et laetetur

In conventu caelitum, Ubi cedit maeror melis, Ubi non est infirmae lis

Carnis contra spiritum.

153. Virgo casta, sed fecunda, Cuius fabrum mundi munda

Lactaverunt ubera, Salvum tuum fac Gauterum, Cum instabit tempus serum, Id est mundi vespera.

154. Te supinis oro palmis,

Corde, oris hymnis, psalmis,

Angelorum domina, Servo tuo da quieta Frui vita post expleta

Temporum volumina.

155. Benedictum benedicta

Profers fructum non afflicta,

Quia tecum Dominus, Per te, quaeso, mihi detur Panis ille, quo repletur

Ventris tui cophinus.

156. Virgo, sacrae legis arca, Quas nulli parcens parca,

Quae tamen inertia, Memor, oro, sis Gauteri, Qui faex est et alga cleri

Minorumque scoria.

157. Fons dulcoris inexhaustae, Servi tui claude fauste

Cosmicam periodum, Ut pro malis non multetur, Cum citatus propelletur

Ad extremum synodum.

158. Per te, mater, inter illos Servos tuos et camillos

Mihi detur synedra, Quibus doctor angelorum Librum legit ethicorum

In sublimi cathedra.

159. Virgo candens ut ligustrum, Cuius felix venter lustrum

Est caelestis hinnuli, Hanc errantem ad pastorem Ovem mina post laborem

Et palaestram saeculi.

160. Virgo, per quam Deus datur Et humanae tunicatur

Naturae diploide, Servum tuum duc ad vitam Post conscissam et detritam

Togam carnis putridae.

161. Virgo, mundi medicina, Verbi vestis et vagina,

Christi creditaria, De ruina vitiorum Nos ereptos angelorum

Coetibus associa.

162. Servum tuum de profundis Tractum misce laetabundis

Superum consortiis, Ut cum illis iucundetur In aeternum et cibetur

Dapibus ambrosiis.