ORATIO DIVI ALBERTI MAGNI De sacrosancto Eucharistiae sacramento saluberrima.

ORATIO DIVI ALBERTI MAGNI De sacrosancto Eucharistiae sacramento saluberrima.

Omnipotens sempiterne Deus, Fili Dei unigenite, qui ex nostro et a nobis et propter nos corpus et sanguinem, et animam humanam, et spiritum assumpsisti, et per sanctum Jeremiam Prophetam quem in utero sanctificasti, pronuntiare dignatus es, dicens quod animas sacerdotum impleturus esses pinguedine, et populus tuus abundaturus bonis , imple sacramento corporis tui animas nostras, et reple in bonis desiderium nostrum, et praesta ut tui corporis et sanguinis admirabile sacramentum, omnem sui in nobis veritatis, virtutis, unitatis, charitatis, puritatis, pietatis, devotionis, et sanctitatis operetur effectum, ut sicut tu in Patre et Pater in te est , et tu in nobis per incorruptam tuae susceptionis naturam, ita in te per corporis et animae maneamus et spiritus integritatem, incorporati tibi sacrosancto corpore tuo, ad sacramentorum salutarem communionem, et tui dulcem participationem, infusi sacrosancto sanguine tuo, ad omnem intimorum nostrorum aspersionem et emundationem: redempti sacrosancta anima tua salutis pretio, ad veram reorum cum Patre et Spiritu sancto reconciliationem : et redemptionem vivificati sacrosancto Spiritu tuo, ad omnem spiritualis vitae in nobis deperditae restaurationem, et sensuum nostrorum illuminationem : gratificati tibi sacrosancta divinitate tua, ad omnem virtutis perfectionem, et de Eucharistia, quae vas omnis gratiae est, de plenitudine tua gratiam pro gratia accipientes, fac nos communicare gratiis quibus sancti Apostoli tui et discipuli de manu tua hoc sacramentum accipientes communicaverunt. Operare in nobis sensum et experimentum spiritualis refectionis intercessione omnium eorum qui ate spiritualiter refecti sunt: operare in nobis fidem, dilectionem, pietatem, devotionem, sacrosanctae unctionis spiritua- lem perfectionem, quae tibi in caena beata Maria Magdalena exhibuit, sollicitudinem, frequentiam, operositatem, diligentiam obsequendi membris tuis, ut experimentalem sensum spiritualis refectionis a te capite mereamur accipere. Operare in nobis sensum Lazari et omnium tecum quiescentium in bonis tuis, quibus disposuisti regnum, sicut illud tibi Pater disposuit, ut edant et bibant super mensam tuam in regno tuo : quia vere beati qui manducabunt panem, qui tu es, in regno Dei . Operare in nobis zelum Petri ignoscentem, et omnia destruentem quae tuae sunt contraria voluntati, quem in caena tua Petrus contra traditorem concepit. Operare in nobis quietem, resolutionem, a mundi delectabilibus perfectam sopitationem, felicitatem, gustum sancti Joannis, quibus ad pectus tuum inclinati et haustum sapientiae et gustum tuae felicissimae accipiamus dulcedinis et bonitatis. Operare in nobis fidem rectam, spem firmam, charitatem perfectam, intercessione omnium Apostolorum et discipulorum tuorum de manu tua hoc sacramentum suscipientium, et fac nos semper aspernari Judae proditionem, et in mentem saepe nobis veniat illa salutaris influentia, quam hoc sacramentum designat, qua te beatis in caelo secundum deitatem influens, operaris in eis omnem suae beatitudinis perfectionem, qui cum Deo Patre, etc.

D. ALBERTI MAGNI,

RATISBONENSIS EPISCOPI,

ORDINIS PRAE DIC ATORUM: